ബസിൽ യാത്ര ചെയ്യുന്നവർക്ക് സഹായകമായ പുതിയ സംവിധാനങ്ങളുമായി കെ എസ് ആർ ടി സി. ഓരോ റൂട്ടിലുമുള്ള ബസ് വരുന്നത് മുൻകൂട്ടി അറിയാനും സീറ്റ് ഒഴിവുണ്ടോ എന്നതുമൊക്കെ അറിയാൻ സാധിക്കുന്ന തരത്തിലുള്ള ആപ്ലിക്കേഷനാണ് കെ എസ് ആർ ടി സി പുറത്തിറക്കുന്നത്. ഇന്ത്യൻ റെയിൽവെയുടെ മൊബൈൽ ആപ്ലിക്കേഷൻ മാതൃകയാക്കിയാണ് പുതിയ ആപ്പ് പുറത്തിറക്കുക. ജിപിഎസ് അധിഷ്ഠിതമായ വിവരങ്ങൾ ആപ്പിൽ ഓരോ ആറ് സെക്കൻഡുകളിലും പുതുക്കിക്കൊണ്ടിരിക്കും. ഇതിനായി കെ എസ് ആർ ടി സിയുടെ എല്ലാ റൂട്ടുകളും ആപ്പുമായി ബന്ധിപ്പിക്കും. കൂടാതെ, ടിക്കറ്റ് വിതരണം, ഓൺലൈൻ റിസർവേഷൻ തുടങ്ങിയ സൗകര്യങ്ങൾ കൂടുതൽ വിപുലമാക്കും. ബസിന്റെ വേഗത അടക്കം കൺട്രോൾ റൂമിൽ അറിയാനുള്ള സംവിധാനങ്ങളും ഏർപ്പെടുത്തുന്നുണ്ട്.
ബസിലെ ഓരോ സ്റ്റോപ്പും, ടെലിവിഷൻ മുഖാന്തിരമുള്ള അനൗൺസ്മെന്റിലൂടെ യാത്രക്കാരെ അറിയിക്കുമെന്നതാണ് മറ്റൊരു പ്രത്യേകത. എല്ലാ ബസുകളിലും സജ്ജീകരിക്കുന്ന ടെലിവിഷനിൽ സ്ഥലം എഴുതിക്കാണിക്കും. ഇത് ഇറങ്ങാനുള്ള സ്റ്റോപ്പ് മുൻകൂട്ടി അറിയാൻ യാത്രക്കാർക്ക് സഹായകമാകും. ബസ് സ്റ്റേഷനുകളിൽ കമ്പ്യൂട്ടർ അധിഷ്ഠിത അനൗൺസ്മെന്റ് സംവിധാനം ഒരുക്കും.
2024 ഡിസംബർ മാസത്തിൽ പുതിയ സംവിധാനങ്ങൾ സജ്ജമാക്കാനാണ് കെഎസ്ആർടിസി ലക്ഷ്യമിടുന്നത്. ബസിൽ ടെലിവിഷൻ സ്ഥാപിക്കുന്നതടക്കമുള്ള ടെൻഡർ നടപടികളടക്കം വരുന്ന മാസങ്ങളിൽ പൂർത്തിയാകും. ടിക്കറ്റ് മെഷീൻ, നെറ്റ് വർക്കിങ് സംവിധാനം ഒരുക്കൽ തുടങ്ങിയവ നടപ്പാക്കുന്നതുമായി ബന്ധപ്പെട്ട് ചില സ്റ്റാർട്ടപ്പ് കമ്പനികളുമായി കെഎസ്ആർടിസി ചർച്ച നടത്തിക്കൊണ്ടിരിക്കുയാണ്. നിരക്കുകൾ സംബന്ധിച്ച് അന്തിമ ധാരണയിലെത്തേണ്ടതുണ്ട്.
നിലവിൽ എ സി സൂപ്പർ ഫാസ്റ്റ് ബസുകളിൽ ലഘുഭക്ഷണം, പാനീയം എന്നിവയടങ്ങിയ റാക്കുകൾ സജ്ജമാക്കി പരീക്ഷണം നടത്തിയിരുന്നു. ഇത് ലാഭമാണെന്ന വിലയിരുത്തലാണ് കെഎസ്ആർടിസിക്കുള്ളത്. ഇതിനാൽ പുതിയ പരിഷ്ക്കാരങ്ങളോടൊപ്പം ഇത്തരം റാക്കുകൾ കൂടുതൽ ബസുകളിൽ സജ്ജമാക്കുന്നത് സംബന്ധിച്ചും ചർച്ചകൾ നടക്കുന്നുണ്ട്. ആധുനിക സാങ്കേതിക വിദ്യയുടെ സഹായത്തോടെ പുതിയ പരിഷ്കാരങ്ങൾ നിലവിൽ വരുന്നതോടെ കെ എസ് ആർ ടി സിയുടെ വരുമാനത്തിൽ വൻ വർധനയാണ് പ്രതീക്ഷിക്കുന്നത്.
