കേരളത്തിലെ ബിസിനസുകൾക്ക് നേട്ടം. മംഗളൂരു വിമാനത്താവളം വഴി ചരക്കുകൾ കയറ്റുമതി ചെയ്യാനും ഇറക്കുമതിക്കും ചെയ്യാനും സാധിക്കും. ശനിയാഴ്ച മംഗളൂരു വിമാനത്താവളത്തിൽ നിന്ന് ആദ്യത്തെ അന്താരാഷ്ട്ര ചരക്കുവിമാനം IX 815 പറന്നുയർന്നു. ശനിയാഴ്ചയാണ് ആദ്യത്തെ വിമാനം അബുദാബിയിലേക്ക് പറന്നത്. ഈ വിമാനത്തിൽ 2,522 കിലോഗ്രാം പഴങ്ങളും പച്ചക്കറികളുമാണ് ഉണ്ടായിരുന്നത്. ഇതിലൂടെ കേരളത്തിലെയും കർണ്ണാടക തീരപ്രദേശങ്ങളിലെയും കയറ്റുമതിക്കാർക്ക് വൻ അവസരമാണ് ഒരുങ്ങിയിരിക്കുന്നത്. വടക്കൻകേരളത്തിലെ കൃഷിക്കാർക്കും, മത്സ്യ വിപണനക്കാർക്കും, ടെക്സ്റ്റൈൽ തുടങ്ങിയ വ്യവസായങ്ങൾക്കുമെല്ലാം നേരിട്ട് ഗുണം ചെയ്യുന്നതായിരിക്കും ഈ വിമാനത്താവളത്തിൽ നിന്നുള്ള ചരക്ക് കയറ്റുമതി-ഇറക്കുമതി സാധ്യതകൾ. വടക്കൻ കേരളത്തിലെ ഉൽപ്പാദകർക്ക് ഗൾഫ് നാടുകളിലേക്കും മറ്റും ഇനി ചരക്കുകൾ എളുപ്പത്തിൽ എത്തിക്കാം. പഴങ്ങൾ, പച്ചക്കറികൾ, മത്സ്യം, കപ്പൽനിർമ്മാണ സാമഗ്രികൾ തുടങ്ങി, പ്രദേശത്തെ വ്യാവസായിക, കാർഷിക ഉൽപ്പങ്ങൾക്കെല്ലാം മികച്ചൊരു വിപണിയാണ് ഒരുങ്ങുക. പാസഞ്ചർ വിമാനങ്ങളുടെ താഴ്ഭാഗത്തുള്ള അറകളിൽ ഈ ഉൽപ്പന്നങ്ങൾ ‘ബെല്ലി കാർഗോ’ ആയി അയയ്ക്കും. ഇൻഡിഗോ, എയർ ഇന്ത്യാ എക്സ്പ്രസ് തുടങ്ങിയ വിമാന സർവ്വീസുകളിലൂടെ ദുബായ്, ദോഹ, ദമ്മാം, കുവൈറ്റ്, മസ്കറ്റ്, അബുദാബി, ബഹറൈൻ തുടങ്ങിയ സ്ഥലങ്ങളിലേക്കുള്ള വിമാനങ്ങളിൽ ഇനി ബെല്ലി കാർഗോ ആയി കേരളത്തിൽ നിന്നുള്ള ഉൽപ്പന്നങ്ങളും ഉണ്ടാകും.
മംഗളൂരു വിമാനത്താവളത്തിൽ നിന്ന് ആഭ്യന്തര ചരക്ക് കയറ്റുമതി-ഇറക്കുമതികൾ 2023 മെയ് മാസം മുതൽ തുടങ്ങിയിരുന്നു. കഴിഞ്ഞ 11 മാസത്തിനിടയിൽ 3,706.02 ടൺ ഉൽപ്പന്നങ്ങൾ രാജ്യത്തിനകത്തേക്ക് കയറ്റുമതി നടത്താൻ ഈ വിമാനത്താവളത്തിന് സാധിച്ചിട്ടുണ്ട്. 279.21 ടൺ ഉൽപ്പന്നങ്ങൾ ഇറക്കുമതി ചെയ്യുകയും ചെയ്തു. കേരളത്തിൽ കണ്ണൂർ വിമാനത്താവളവും കാർഗോ കയറ്റുമതി-ഇറക്കുമതി കേന്ദ്രമാകാൻ ശ്രമിക്കുന്നുണ്ട്. കേരളത്തിന്റെ കാർഗോ ഹബ്‌ എന്ന ലക്ഷ്യം വെച്ചാണ് പ്രവർത്തനം. ദ്രാവിഡൻ ഏവിയേഷൻ സർവീസ് പ്രൈവറ്റ് ലിമിറ്റഡിന്റെ നേതൃത്വത്തിൽ കാർഗോ സർവീസ് തുടങ്ങിയിട്ടുണ്ട് ഇതിനകം. ചരക്കുനീക്കത്തിന് അത്യാധുനിക കാർഗോ കോംപ്ലക്സ് ഇവിടെയുണ്ട്.
പ്രതിവർഷം 20,000 ടൺ കാർഗോ കയറ്റുമതിയാണ് ലക്ഷ്യം വെച്ചിരിക്കുന്നത്. എന്നാൽ കൊവിഡ് കാലത്ത് ഈ പ്രതീക്ഷകളെല്ലാം തകിടം മറിഞ്ഞു.
ദേശീയപാത ആറുവരിയാക്കുന്നത് മംഗളൂരുവിൽ നിന്നുള്ള ചരക്കുനീക്കത്തെ സഹായിക്കും. ഇത് കണ്ണൂരിനും കേരളത്തിലെ മറ്റ് വിമാനത്താവളങ്ങൾക്കുമെല്ലാം ഗുണം ചെയ്യുന്ന കാര്യമാണ്. കർണാടകത്തിലെ കുടക് മേഖലയിൽ നിന്നുള്ള കാർഷികോൽപ്പന്നങ്ങളും മറ്റും മംഗളൂരുവിന് സഹായകരമാകും. കേരളത്തിൽ ഏറ്റവും കൂടുതൽ ചരക്ക് നീക്കം നടക്കുന്ന വിമാനത്താവളം കൊച്ചിയാണ്. രണ്ടാംസ്ഥാനത്ത് കോഴിക്കോടും മൂന്നാം സ്ഥാനത്ത് തിരുവനന്തപുരവുമാണ്.
