കൊച്ചി: ദുബായിലെ നിക്ഷേപകര്‍ കേരളത്തില്‍ 10,000 കോടി രൂപയുടെ നിക്ഷേപം നടത്തുമെന്ന് മുഖ്യമന്ത്രി പിണറായി വിജയന്‍. ദുബായില്‍ നടന്ന നോണ്‍ റെസിഡന്റ് കേരളൈറ്റ്‌സ് എമേര്‍ജിങ് ഓണ്‍ട്രപ്രണേഴ്‌സ് മീറ്റില്‍ വെച്ച് നിക്ഷേപകരാണ് ഇത് സംബന്ധിച്ച ഉറപ്പ് മുഖ്യമന്ത്രിക്ക് നല്‍കിയത്. ഡി പി വേള്‍ഡ്, ആര്‍ പി ഗ്രൂപ്പ്, ലുലു ഗ്രൂപ്പ് തുടങ്ങിയ കമ്പനികളും ചെറുകിട നിക്ഷേപകരും ചേര്‍ന്നാണ് കേരളത്തില്‍ നിക്ഷേപം നടത്താന്‍ താല്‍പ്പര്യം പ്രകടിപ്പിച്ചത്.
കേരളത്തെ മുന്‍നിര ഇന്‍വെസ്റ്റ്‌മെന്റ് ഡെസ്റ്റിനേഷന്‍ ആക്കി മാറ്റുമെന്നും മുഖ്യമന്ത്രി പറഞ്ഞു. എന്‍.ആര്‍.ഐ സംരംഭകര്‍ക്കായി ഉന്നത തല ഇന്‍വെസ്റ്റര്‍ കൗണ്‍സില്‍ രൂപീകരിക്കും എന്നും മുഖ്യമന്ത്രി കൂട്ടിച്ചേര്‍ത്തു. വേഗത്തില്‍ വളര്‍ന്നു കൊണ്ടിരിക്കുന്ന സംസ്ഥാനത്തിലേക്ക് കൂടുതല്‍ നിക്ഷേപകരെ സ്വാഗതം ചെയ്യാനും അദ്ദേഹം മറന്നില്ല. ഡിസംബറില്‍ കൊച്ചിയില്‍ ഇന്‍വെസ്റ്റേഴ്‌സ് മീറ്റ് നടത്തുമെന്നും അദ്ദേഹം സൂചന നല്‍കി.
ഏറ്റവും കൂടുതല്‍ നിക്ഷേപം പോര്‍ട്ട് മാനേജ്‌മെന്റ് കമ്പനിയായ ഡി പി വേള്‍ഡിന്റേതാണ്. 3500 കോടി രൂപയായിരിക്കും ഡി പി വേള്‍ഡ് കേരളത്തില്‍ നിക്ഷേപിക്കുക. ആര്‍.പി ഗ്രൂപ്പ് 1,000 കോടി രൂപയും ലുലു ഗ്രൂപ്പ് 1,500 കോടി രൂപയും നിക്ഷേപിക്കും.
ആസ്റ്റര്‍ 500 കോടി രൂപയും മറ്റു ചെറുകിട നിക്ഷേപകര്‍ ചേര്‍ന്ന് 3,500 കോടി രൂപയും നിക്ഷേപിക്കുമെന്നാണ് വിവരം. ഷിപ്പിങ് , ലോജിസ്റ്റിക്‌സ് മേഖലയില്‍ നിക്ഷേപം നടത്താനാണ് ഡി.പി വേള്‍ഡിന് താല്‍പ്പര്യം എങ്കില്‍ ആര്‍.പി ഗ്രൂപ്പ് ടൂറിസം മേഖലയിലായിരിക്കും നിക്ഷേപം നടത്തുക. ലുലു ഗ്രൂപ്പ് റീട്ടെയ്ല്‍ മേഖലയിലും ആസ്റ്റര്‍ ഗ്രൂപ്പ് ആരോഗ്യ മേഖലയിലും നിക്ഷേപം നടത്തും.
